腩麵茶餐廳 (Closed)

前幾日去北角上堂，放學同同學仔一齊去飲杯嘢，路經琴行街，見到轉角位附近新開左間「腩麵茶餐廳」。走過去睇下門外餐牌，店舖除了以牛坑腩、崩沙腩、牛三寶作招徠外，另外亦有魚蛋粉麵、自製咖喱飯、手工水餃、鮮蝦雲吞等供應，選擇十分豐富。見價錢都幾經濟實惠，所以已經即時 mark 低左間餐廳，趁今晚有空，專登過去試下。餐廳地方不大，舖面細細，但以牛腩小店來說，格局算光鮮，坐得舒服。點左五香招牌崩沙腩淨食 ($138)，另外再加左潮州墨魚丸河 ($25)、彈牙牛丸麵 ($25) 同 一碟菜心 ($12)。崩沙腩果然係店舖嘅招牌作，炆得十分腍滑，肉質肥瘦適度，頂部肥腴部位咬下有筋膜嘅質感，入口爽軟不硬，吃起來既軟糯又帶點嚼勁，而且送上來時更傳出陣陣滷水嘅香氣，無論下飯、拌麵或佐酒均是佳品。至於兩碗粉麵，表現跟定價亦恰如其分，墨魚丸真材實料，大大粒，咬下爽口彈牙，鮮味十足，配滑溜嘅河粉食，味道不錯。牛丸水準亦不俗，肉質結實，入口脂肪不多，配上爽彈嘅麵條，既飽肚又滿足。油菜亦唔馬虎，食落新鮮爽甜，而且面頭淋左腩汁，可見小店嘅用心。