海港酒家

Open Now

Now Closed

今個月見到街市，超市都買緊松葉蟹，心思思想食番隻。收到朋友信息，話這呢間酒樓做緊298元一隻，堂食外賣都得，咁我就去酒樓食，可以乾手淨腳。平日晚市都有好多客。坐底即落單，松葉蟹一隻。之後再睇下餐單加其他菜式。我哋得兩個人，今次係為咗食蟹先嚟，所以唔會叫太多嘢食。最後決定每人叫個燉湯，加多個漁香海鮮燒豆腐。燉湯先上，羊肚茵燉螺頭。湯夠熱，羊肚茵散出淡淡香氣，湯內都有好多料，螺頭切成片狀，燉完都冇咩味。成個湯唔會好鹹，味道剛剛好。飲完湯，漁香海鮮燒豆腐送到。煲仔上，成煲料都熱辣辣，豆腐皮薄內嫩，吸滿醬汁好好食，汁有少少辣，夠惹味。海鮮有珊瑚蚌、蝦、帶子，樣樣都爽口鮮味。食食吓，主角上場，大大隻橙紅色的松葉蟹放係一隻大碟上上檯。蟹鉗、蟹腳、蟹身呈現眼前。打開蟹蓋，一大埋墨綠色嘅蟹膏呈現眼前，用匙羹挖出來食，食極都仲有。蟹鉗大塊肉，肉質鮮甜中又有些鹹味，食得出係海水味呀。蟹腳都唔差，一樣有好多肉。呢種蟹個殼本來好易剪開，不過酒樓把較剪鈍鈍哋，要俾D耐性先得。食完隻蟹好滿足。唔駛煮唔駛洗，有靚蟹食，真係唔錯。呢間酒樓嘢食幾好，只係服務差少少，不過為左食就包容下。