馬祖 (將軍澳廣場) (Closed)

天氣凍凍地，又係火鍋季節，今日朋友帶左我去食台式藥膳養生火鍋。台式藥膳火鍋湯底有12款，另外有6款套餐。我哋就叫左$303美國Prime Grade極上牛頸及西班牙伊比利亞黑毛豬放題，叫做中價套餐。店員話肉類可以叫佢哋落單，其他火鍋配料如菜、菇、丸、麵、腸仔同汽水可以在外面自取，另外仲有兩個雪櫃放雪榚，見到都開心。藥膳椰子清雞湯：椰子味香濃，裡面有紅棗杞子等，滋補又養生。藥膳蕃茄麻辣湯：朋友話淡淡蕃茄味，辣辣地，幾惹味。肉類：牛肉有美國Prime Grade極上牛頸脊同肩胛肉眼，豬肉就有西班牙伊比利牙黑毛豬同無激素豬肉片。兩款肉味濃，薄切得黎有口感，幾好食。其他火鍋配料：自取火鍋配料分類整齊，擺放乾淨企理。朋友話呢度丸類特別好食，佢話最鐘意芋頭丸，咬落去有芋頭蓉。另外菜都菇都洗得乾淨，菜又綠又爽口。飲品：種類都幾多，冬天有熱飲櫃，涼涼地飲熱飲最好。甜品：兩大雪櫃裝滿甜筒雪榚雪條，佢有我至愛嘅movenpick，另外仲一款香港自家品牌dadolce嘅gelato呀。我都係第一次見炸，價錢同movenpick睇齊。意大利乳酪口感細膩同軟熟，呢度兩款我都食左，好滿足，真係值回票價。