旺記冰室 (大本型) (Closed)

中午決定去試下屋企附近新開嘅旺記冰室。聽聞佢最出名嘅就係滑蛋飯，而我又幾鍾意食滑蛋，所以就決定去試吓啦。因為係新開嘅關係，所以都好乾淨，望落印象感覺幾好。而且因為職員都唔少，所以我一入去就即刻有人安排我埋枱，唔使要我等好耐。餐牌選擇就唔多，主要都係通粉同埋滑蛋飯。而當日嘅特製飯餐就係忌廉汁豬扒飯。不過因為我都係想食滑蛋飯啦，所以最後都係嗌左滑蛋叉燒蝦仁飯同熱朱古力。埋單60蚊。杯熱朱古力都係正常茶餐廳會有嘅嗰種，味道冇咩特別。跟住我碟滑蛋叉燒蝦仁飯就到咗啦，上菜時間都唔係好長，大概三四分鐘度。雖然叉燒有啲薄，但係份量都唔少，塊塊都好大塊，而且有好多塊。至於蝦仁亦都係大大隻，咬落去都叫爽口彈牙。而且飯嘅份量都好多，成座山咁多。但係甜豉油嘅份量就有啲啲啲多。不過滑蛋亦都的確係幾滑嘅，唔會炒得太乾身。整體來講，都係一碟幾唔錯嘅滑蛋叉燒飯。