麵館皇 (Closed)

今晚想食完野先去睇戲，諗起之前朋友話銅鑼灣麵館皇唔錯，見謝斐道開咗間新嘅分店，所以決定喺度食啦。今晚叫咗:麻辣口水雞刀削麵酸辣湯雲呑手擀麵等待食物上枱時，見到旁邊嘅師傅啱啱開始整小籠包，即場製作而唔係叫貨返嚟賣，下次可以試下。（地方都幾整潔）等咗約10分鐘，食物開始送到。酸辣湯雲呑手擀麵酸辣湯好濃稠，裡面有好多配料，例如木耳、豆腐、肉絲等等，酸味同辣味平衡得幾好，手擀麵煙靭又彈牙。雲呑都唔錯，皮薄餡靚，比起平時出街嘅好食好多，最怕食到厚皮雲呑。麻辣口水雞刀削麵口水雞同刀削麵係分開兩碟上菜嘅，刀削麵嚟到嘅時候仍然喺藥膳湯裡面滾動梗，而且微微發出好香嘅藥膳味，好吸引。藥膳湯味道濃郁，連平時討厭藥膳味嘅Mr.J都覺得唔錯。刀削麵吸收咗藥膳湯嘅精華，好入味，麵質有少少煙靭。至於麻辣口水雞嘅份量都幾多，雞肉嫩滑唔太肥，下面墊底嘅青瓜好爽口，帶點小清新。雖然係麻辣口水雞，連平時唔太食到辣嘅我都食到，感覺幾好。（不過隔離枱嘅先生辣到不斷咳。。。)成日行經登龍街嘅分店，感覺比較迫少少，謝斐道嘅相對面積更大同闊落，而且樓底較高，坐得更舒服。