Sweetology (Closed)

以前讀書年代成日去又一城溜冰，但出左黎做野之後都冇再溜過冰，甚至連又一城都好少去。咁岩又一城戲院新開我先過黎，睇戲之前見格離新開左間餐廳就食個下午茶啦。成間餐廳以白色為主，由坐椅、牆身至裝飾品都用左白色，感覺好優雅。望埋個餐牌，有英式早餐同女仔最愛既甜品，食物款式算多，而且價錢也大眾化，難怪吸引左大批女仔，特別係大學生同中學生。英式全日早餐食材好豐富，有北海道3.6牛奶炒蛋、煙肉、香草腸、法蘭克福腸、煙三文魚、焗豆、薯條、蕃茄同雜菜沙律。炒蛋軟滑，不過奶味未算特出。煙三文魚軟綿不過唔夠油潤。煙肉偏肥，不會煎得幾香。香腸外皮香脆，薯條香脆可口。不過最鐘意係落左橙汁既雜菜沙律，清新又唔會過於單調。士多啤梨蜜糖吐司盒吐司即叫即整，等候時間長少少。吐司焗得金黃色，外層香脆又帶點蜜糖，厚身既吐司沾上Movenpick雪糕，加埋甜美既士多啤梨，不論賣相同味道都非常好‧如果麵包預先切細條就更方便食用，改善埋就完美啦。特別一提全店既雪糕都係用Movenpick雪糕，鐘意食既朋友唔好錯過。最後跟餐仲有柚子冰紅茶送，但如果可以跟餐加錢轉其他飲品，例如水果茶或特色咖啡就更好啦。