嚐味喇沙 (Closed)

去沙田市中心做啲嘢，順便食埋飯先返屋企。午飯時間，唔想去茶餐坐得咁迫，行行下見倒呢間啲座位幾鬆動就決定喺呢度食。入座後侍應畀咗個QR code我哋落單，話有九七折。但係佢個code可能有啲問題，我哋大大話話用咗兩部電話試咗七八個唔同嘅App，搞咗成廿幾分鐘先落倒單。當中有侍應咗我哋張枱好多次(可能係諗緊點解咁耐仲唔落單啩！)，但係都無走嚟了解下😜。叫咗無骨海南雞飯配椰子雞湯。雞肉煮得幾嫩，有少少肉汁。油飯香但唔油，不過稍凍。椰子雞湯有好濃嘅椰子味，好甜又夠熱，唔錯。火車頭湯河，餸就有幾個牛唔同嘅部位如肥牛、牛腩、牛筋等等。湯底味濃、河粉幼身，索晒啲湯汁，好味。牛腩牛筋煮得太耐，冧晒，無口。最犀利係開始食嗰時有侍應攞返兩粒牛丸畀我哋，話畀漏咗喎！咖啡就係港式茶餐廳口味，無咩特別。埋單時竟然無畀九七折，都係怪自己無計好數就行出去畀錢，返到屋企先發現蝕咗。