王朝潮盛館 (Closed)

上次同屋企人食過，覺得唔錯，又近屋企附近，今晚無煮飯，所以又過來食。上次叫左鵝片三拼，今次試吓鵝件雙拼；仲叫左酸菜魚、西蘭花炒帶子及椒鹽竹炭豆腐。鵝件雙拼（鵝件、墨魚）今次試吓有骨嘅鵝件，滷水汁保持一貫嘅水準，調味啱啱好，我覺得配鵝件比鵝片好食，墨魚一樣新鮮彈牙，配上滷水豆腐底，冇得輸。酸菜魚媽媽唔係好食得辣，都覺得呢個好好食，魚片非常之嫩滑，魚湯鮮甜得來酸酸地辣辣地，非常好飲，配菜有酸菜、木耳、萵筍及芽菜，都幾豐富。西蘭花炒帶子今次帶子熟度煮得剛剛好，配上翠綠爽甜西蘭花，好味。椒鹽竹炭豆腐炸到香脆嘅竹炭外層，配上嫩滑嘅豆腐，加上辣辣地嘅椒鹽，非常之香口惹味。