一條腸粉 (Closed)

行完金魚街， 補給左大量物品。 真係又攰又餓。見倒條粉腸， 丫唔係， 係一條腸粉先岩。 睇大圍頭， 試下就試下啦。   一坐低就拎菜牌同筆tickticktick,聽員工講 聖子王腸粉好好食就試下。 一試不得了。 好大隻嫩嫩既聖子係佢新鮮即磨即煮既潮式腸粉上面。 先知道， 原來海鮮同腸粉係咁夾既！ 雖然唔係咩特別野， 不過佢個手打牛丸真係好好食！ 勁彈牙又冇雪味， 我地仲翻叫左成3碗。 跟住佢有樣野叫「扁實」 睇返介紹， 原來係雲吞既一種， 不過d肉特別打到爛晒易入口。 個餡好足料！係咩黎， 都係睇相自己睇介紹！佢個巨形魚蛋同獅子頭， 各有好處。 一個就彈牙， 一個就啖啖肉， 真係唔知邊個好d, 食晒佢算。 個馬餃魚丸， 睇落聽落都冇咩特別， 係一咬落去就好香魚味走出黎， 但一d都冇魚腥味。 送酒一流。 其實仲有叫炸饅頭啦燒賣呀蝦餃之類點心。 都好熱即蒸新鮮， 但都冇佢地汕尾小食咁特別， 自己去試下就唔洗介紹喇。 到最後都係忍唔住， 個潮式腸粉太好食， 所以翻食左個元貝腸粉。 真係飽晒！ 好滿足！