河內大娘越南餐廳 (Closed)

餐廳喺尖沙咀漆咸道南近K11，室內掛滿越南斗笠，廚房佈置到成間草屋咁，好有越南風情。今次唔係第一次去食，鍾意呢度係因為食物好有越南地道風味，又不時推出新菜式。【龍眼蓮子冰】雖然杯飲品叫「冰」但係可以揀熱飲㗎。蓮子清心補脾腎、龍眼補血安神，出面咁凍，飲杯甜溫熱又甘甜嘅滋補飲品就啱晒。一定要食埋啲蓮子同龍眼肉呀。【青檸梳打】朋友就話食越南菜飲凍嘢先爽，青檸梳打夠晒fresh，就算冬天都feel到夏天嘅chill感覺喎～【大蝦柚子沙律】大蝦係熱嘅，食落爽口鮮美。下面係好多果肉嘅柚子沙律，酸酸甜甜再加少少辣，清新又開胃。【越南烤豬肉奧巴馬粉】用秘製方法烤嘅豬肉，香烤味同香茅味重，配甜酸汁嘅檬粉一齊食，或者用生菜包豬肉嚟食，都充滿越南風味。【順化粉(豬紅、豬手、牛展、扎肉)】冬天梗係整碗熱騰騰嘅湯粉，呢碗粉好多肉做配料，食完熱量十足。豬手多肉，肉質鮮嫩juicy；扎肉厚切，有啲粒粒軟骨。全碗粉最精粹係個海鮮湯底，用米線做底，掛湯能力高所以食落鮮味十足，更提升鮮肉味。