海都車仔麵茶餐廳

Open Now

Now Closed

因為朝早食左兩個包頂住，所以晏就個餐就拖到兩點零先食，唔想又食番樓下間燒味飯咁悶，又聽同事話熟食中心個到有間野唔錯，三餸麵連凍熱野飲都係$31，一於去試下啦。一入熟食中心向右望就係海都啦，其實以車仔麵黎講，間野無論係餸菜，麵底，湯底，飲品，都算多選擇，我叫左個雞扒雞翼蘿蔔清湯，飲凍檸水，等左幾分鐘就整好個餐，店家取餐位個到有好多調味料可以自己任加，另外仲有兩大兜蔥花同炸蒜，比你決定落又得，唔落又得！其實碗野望落就一般啦，夠熱，冇咩特別，試左啖麵，夠彈牙，但有小小梘水味。湯底雖然叫清湯，但係查實都幾濃味。蘿蔔我欣賞有卥過，但係煮得太耐，雖然入味，但係冇左蘿蔔嘅清甜，而且蘿蔔細舊又有渣。雞翼細隻，卥得太耐，入味但肉質又鞋又老，感覺像翻煮了兩三次。雞扒更差，只有幾塊碎塊，還是卥得太耐，入味，但肉質直接變柴，就好似卥完之後放左兩日雪櫃，先抽一抽亁，再翻卥，又亁又韌。檸水太甜，甜過糖水。但睇番個價錢，勉強合格啦。只係同場有咁多間食肆，我應該唔會再選擇海都。