來佬餐館 (Closed)

今日約左朋友係灣仔食飯，我地最近都好多鎖碎煩事，所以今日諗住食餐好啲嘅， 我就要負責諗下食乜。但灣仔呢區每逢lunch時間都人頭湧湧， 想搵間好啲啲坐得舒服但又唔係天價嘅餐廳一啲都唔易！上網search左一輪，決定嚟試來佬餐廳， 佢當日係中環開時我就一直想嚟試架喇， 但一直都陰差陽錯搵唔到機會， 今日佢搬到灣仔，我終於可以嚟試喇👍。我訂了12：30pm, 可能附近啲人都放1：00掛，所以我到時都唔算多人， 不過到落完單之後就陸續填滿客人。我想食飯， 所以點了濶佬雞蛋义燒飯，而朋友就要左份有得鋸扒嘅午餐。餐湯是磨菇湯， 味道唔錯， 都認真食到磨菇蓉嘅。呢個义燒飯果然係濶佬先會點， 事關價錢一點也不便宜，如果加錢要埋塊鵝肝就仲名貴添，好似我咁😝。义燒的而且確好好味，肉質鮮嫩，味道適中，而且义燒件嘅份量亦算多，但米飯就較硬身同有點凍，太陽蛋就冇 理由會出事。另外加錢加嘅鵝肝，雖然質素同味道都唔錯，但乾爭爭咁上碗，一點油水或醬汁都冇，感覺有點差🙄！朋友嘅午餐牛扒 🥩烹調煎法都OK, 但牛扒肉味道偏淡口。最後餐飲沒特別，咖啡有點差。總括黎講這餐飯味道只屬不過不失，但性價比就有點低。