Video
Read full review
2018-10-08
3822 views
經過悠長嘅炎夏，卒之有啲秋意喇，最想嘅喺去日本睇紅葉，不過，基於工作關係，10月、11月都喺難以請假嘅日子。最近，就同朋友仔去到灣仔「香港諾富特世紀酒店」嘅Le Cafe食自助餐，皆因知道佢哋趁日本秋祭新推出嘅主題：「東瀛の味」自助晚餐，睇起嚟幾吸引嘛。自助晚餐供應時間喺每日6:30pm– 9:30pm，價錢方面，以成人計，星期一至四收$508+10%，而星期五至日、公眾假期及前夕則只貴少許，收$538+10%。成為酒店FB專頁粉絲更提供低至65折嘅折扣優惠，所以，平日嚟食番餐，折後連加一，都只喺$381咋，供應期去到11月30日。酒店離灣仔港鐵唔遠，所以，嚟Le Cafe都相當方便，而餐廳位處1樓，地方都幾闊落，枱與枱之間嘅空間足，唔會太逼，配合柔和燈光，感覺都幾舒服。最鍾意喺有少量圓枱，適合7到8人，方便圍住傾偈。既然主題喺東瀛，場內自然有唔少相關嘅佈置、裝飾，確喺增添唔少氣氛。當你留意到食物名牌特別以秋葉設計嘅，就表示喺主題菜式，無正式數過，但目測估計都有近三十款，分布晌唔同食物類別當中。然而，所有食物都擺放得夠集中，晌入門口右邊區域，就有兩大張長型食物枱，擺放沙律、冷盤、海鮮、
自助晚餐供應時間喺每日6:30pm– 9:30pm，價錢方面，以成人計，星期一至四收$508+10%，而星期五至日、公眾假期及前夕則只貴少許，收$538+10%。成為酒店FB專頁粉絲更提供低至65折嘅折扣優惠，所以，平日嚟食番餐，折後連加一，都只喺$381咋，供應期去到11月30日。
酒店離灣仔港鐵唔遠，所以，嚟Le Cafe都相當方便，而餐廳位處1樓，地方都幾闊落，枱與枱之間嘅空間足，唔會太逼，配合柔和燈光，感覺都幾舒服。最鍾意喺有少量圓枱，適合7到8人，方便圍住傾偈。
既然主題喺東瀛，場內自然有唔少相關嘅佈置、裝飾，確喺增添唔少氣氛。當你留意到食物名牌特別以秋葉設計嘅，就表示喺主題菜式，無正式數過，但目測估計都有近三十款，分布晌唔同食物類別當中。
然而，所有食物都擺放得夠集中，晌入門口右邊區域，就有兩大張長型食物枱，擺放沙律、冷盤、海鮮、熱盤、湯品……等等，另外仲有兩大個開放式廚房，供應唔少即製美食，最邊邊就喺飲品區及甜品區。
為配合東瀛主題，更特別提供日本酒品，如清酒及特色雞尾酒，不過，喺需要另外加錢享用。
自助飲品吧一邊喺檸茶、橙汁、啤酒，另一邊就有紅茶、即磨咖啡及檸檬片，唔使多介紹，都知點搞啦。好似小弟依啲慳友，既然餐廳提供自助飲品吧，任斟任飲，就梗喺飲佢啦，鮮橙汁啱我，一邊食一邊飲。臨尾，亳無懸念，就喺咖啡伴甜品。
沙律先介紹吓自助餐必備嘅沙律吧，幾款沙律菜、十多款配料、幾款醬汁、數款預製好嘅特色沙律，整體唔算話好特別，但就做足基本，唯最意外沙律菜其中一款喺羽衣甘藍，而隨意都可以砌出一大份沙律拼盤。
生果盤是晚所供應嘅生果有新鮮菠蘿、西瓜及哈蜜瓜，其實啲生果擺晌甜品區嗰邊，不過，我嘅「頭盤」有佢，就先介紹吓。
頭盤先喺一大碟叫人越食越開胃嘅雜綿沙律，樣樣沙律菜、配料都要啲，再加點新鮮生果。哈哈，呢個組合近乎喺小弟次次食自助餐嘅指定動作，而食材用料新鮮，已經唔會差得去邊。
冷盤可以講分開兩組，一組喺慣常所見嘅西式，如煙三文魚、火腿片、燒牛肉，但亦有不常見嘅雞肉薄片及鴨肝醬。
而另一組就喺主題嘅日式，咁會有啲咩呢？如牛蒡絲、炙燒三文魚、多款和風漬物。
朋友就夾咗少少返嚟食，小弟就黐佢少少過吓口癮，感覺唔錯喎，整得有板有眼，尤其啲牛蒡絲，爽爽脆脆。
凍海鮮、即開生蠔初頭行第一轉時覺得海鮮類唔算強，只喺見到松葉蟹腳、凍甜蝦、翡翠螺及青口而已，再行埋其他區域，先發現晌另一邊，原來有嚟自法國及愛爾蘭嘅即開生蠔，成晚源源不絕供應，食幾多就要幾多。
啲生蠔質素不賴呀，雖然唔喺話好大隻，但夠鮮味，質感爽脆，帶濃濃嘅海水鹹鮮味，蠔味嘅餘韻長。
再嚟一碟就凍海鮮拼冷盤嘢，蟹腳及甜蝦都冰涼鮮甜，尤其啲蟹肉食落確喺帶鮮味；冷盤方面，燒牛肉覺得比較好，其他幾樣就一般般啫。
麵包籃有長法包、小個裝嘅歐陸包，原來下層仲有啲牛角包添，真喺唔好奇拉開都唔知有好嘢。
芝士盤就晌麵包籃旁，放有多款軟硬芝士，如車打、艾文、羊奶芝士……等等，配以少少紅莓乾。小弟覺得，有唔少食物都缺少咗啲名牌，如加番晒就好啲。
湯品餐湯分別擺晌熱盤區長食物枱兩邊，雖然呢度無燉湯，但有啱晒我呢啲氣管唔好嘅海底椰鱷魚肉湯，而另一邊就有和風主題菜式嘅麵豉湯，以取代西湯。
食到中尾段，搵碗中湯間場，齋飲悶悶哋，所以拼少少法包及芝士。個湯都幾清甜、幾潤，法包極有咬口，拼乜嘢芝士都襯。
熱盤區夾雜多款中西日菜式，先講主題菜式先，就包括有日式天婦羅（炸野菜及炸蝦）、茶碗蒸（日式蒸蛋）、鹽燒鯖魚、豚角煮（炆黑豚腩肉）、壽喜燒（日式火鍋）、關東煮、日式咖喱豬肉、日式鰻魚飯，而其他熱葷就仲有煙烤汁燒雞、杞子上湯娃娃菜、家鄉紅燒肉、原條蒸海上鮮、香濃茄汁燴扁豆、印度蝦咖喱。
刺身、壽司飯晌其中一個開放式廚房就提供咗多款刺身，包括三文魚、油甘魚、劍魚腩、八爪魚，但另外加映原隻北海道帶子及紅蝦刺身碗，一小份一小份預備好晒等客人自助。
壽司至於啲壽司，一大盤雜錦款式擺咗晌凍海鮮嗰邊，旁邊仲備有酸薑，喺食刺身或壽司嘅好拍檔。此外，壽司旁仲有啲蕎麥冷麵。
見啲帶子及紅蝦好似幾正，所以，就夾埋啲刺身及麵豉湯砌成一份和風組合。帶子及紅蝦同樣爽口鮮甜，反而，另外幾款刺身小弟就覺得不過不失，較大問題喺唔夠凍。食咗幾樣凍嘢，飲番啖麵豉湯暖暖胃、平衡吓就最好，而碗麵豉湯又幾唔錯喎，加咗少少煙肉，陣陣麵豉再帶點鹹香。
拉麵屋台平常晌自助餐度，甚具本土特色嘅車仔麵喺必備，但嚟到依度，因為主題關係，就改以日式拉麵、烏冬上陣，配以香濃嘅豬骨湯。當然，餸料就變成日式叉燒、肥牛、鳴門卷、油豆腐、木耳絲、筍乾……等等。
爐端燒、鐵板燒另一邊開散式廚房就有爐端燒、烤肉及即烤薄餅，先介紹前者，無正式統計，不過凡經過時就望一望，大概見到有雞肉串、雞軟骨、燒五花腩、炸和牛粒……等等，而側旁仲有啲鐵板燒茄子、冬菇、鱆魚小丸子……等等。
烤肉是夜就有西冷及羊架兩款，兩款肉都燒得好靚仔、好吸引，而枱前就放有多款調味，燒汁同黑椒汁就基本架啦，仲有英式芥末、香檳芥末、法式芥末及辣根汁。
即烤薄餅開放式廚房後設咗一大座烤爐，專用嚟製作薄餅，清楚睇見麵粉糰及多種配料，所有薄餅都晌度即做，可謂新鮮出爐。如果能夠改為做啲迷你薄餅，客人點先即烤烘，新鮮熱辣送上枱，咁嘅效果就真喺一流。不過，呢啲又喺牽涉人手問題。
接近尾聲，先嚟一碟主題菜式嘅熱盤，茶碗蒸好食，啲蛋滑，底下有好多配料；豚角煮亦好食，香濃而鬆化；串燒和牛粒及壽喜燒牛肉同樣好味，軟腍有牛肉香；相反，關東煮就浸得太腍（因為小弟喺近尾段時間先食），天婦羅唔喺炸起即食，亦變得大打折扣，所以，天婦羅放晌爐端燒嗰邊，小批量去做以保「新鮮」效果會理想啲。
第二碟熱盤就選取咗西冷、羊架、燒雞、薄餅同小丸子，兩款烤肉都比預期好喎，西冷烤得啱啱好，質感軟腍，而羊架肉質好柔嫩，兼且唔太羶；薄餅就始終唔喺即焗起就即食，質素會喺無咁理想，最唔得啲小丸子，腍晒得糰粉。
甜品區基本上集中晌右邊末端位置，先見到一大張圓枱，分上下兩層放滿各式各樣嘅甜品，有大個裝嘅蛋糕，如綠茶慕絲蛋糕、芝士餅、黑森林蛋糕……等等；而的的骰骰嘅甜點亦唔少，好似啫喱、布甸、奶凍、慕絲杯……等等；此外，以日式為主題嘅和果子、北海道牛乳布甸，不少都甚具特色，賣相精緻。
仲有就喺小朋友睇見至開心，有得玩，有得食嘅朱古力噴泉，以及即製班戟機。
因為今次遲去，又食得慢，所以，輪到我嘅甜品時段時就無咗部份款式，但點都砌到一大碟甜點拼盤。幾款日式和果子OK喎，好肉柿子嘅南瓜丸子好有驚喜添，件櫻花豆沙卷亦討人喜心；綠茶慕絲餅中間夾有芒果啫喱，多咗層次嘅變化，黑森林亦真材實料，混有浸咗酒嘅車厘子果肉。整體嚟講，實屬唔錯。
Movenpic雪糕唔單止甜品唔少，更供應成本唔平嘅Movenpic杯裝雪糕，一共有5款口味，好幾款都喺小弟嘅心水口味。
一起手揀咗4款，但唔喺我一個人食晒，友人都好鍾意食雪糕，想試多啲款但又怕食唔到咁多，故此，就一於攞4款嚟「些牙」。Movenpic雪糕一晌有質素，唔使多懷疑，4款味亦都正，推介就梗喺楓糖合核及意大利濃縮咖啡啦，超正。
順帶一提，甜品區附近更擺咗支朱古力漿，目的喺俾客人可以晌啲甜品上寫啲祝福語，慶祝好友生日就最好不過，但前題喺手字寫得靚先好搞，哈哈！
諾富特酒店晌香港有3家酒店，先後都幫襯過晌東涌嘅「諾富特東薈城酒店」Essence餐廳及佐敦嘅「香港九龍諾富特酒店」the SQUARE餐廳，是夜到訪埋Le Cafe餐廳。綜合去過嘅經驗，Essence環境比較闊落寬敞，因東涌地方大嘛；而食物質素就以Le Cafe秤高少少，尤其呢晚啲主題美食。順帶講吓服務，食物嘅補充、店員嘅收拾都算勤快，去到9:00pm，我見有部份客人都陸續離開，但有啲食物都照補充。然而，食物加番晒啲名牌會好啲，因為有啲人可能就喺唔知乜嘢而唔敢試，食自助餐好玩在大把嘢俾你試吓嘛。
Post
