Bifteck (Closed)

灣仔QRE成幢都食過好多間，呢排睇到有間試業緊既steak house- Bifteck。工業風裝修幾有氣氛，侍應態度都好好禮貌，每碟上菜時仲會細心講解餐包平時多數配牛油，但今次配味噌醬又真係第一次試。昆布醃蕃茄及水牛芝士打卡一流，水牛芝士好似剝殼雞蛋咁滑身，芝士味好清爽。火炙 A5 和牛油花豐富，口感軟腍，配埋西班牙紅蝦卷伴龍蝦啫喱都幾有創意。和牛蘑菇清湯菌香超濃，但個湯又好清，牛舌三星蔥卷都係用左靚牛，咬落好嫩。以為呢度得牛食，原來都有海鮮main dish，西班牙紅蝦烏冬有隻超巨型大蝦，蝦味勁濃，配埋烏冬仲可以索哂d汁。日本蘿蔔蟹肉菠菜湯似平時西式忌廉湯，但就再稠身多d，飲完成個人都暖哂。澳洲純種和牛腰肉燒到好有焦香，個醬酸酸地好醒神，不過有少部分位就有d筋，會有少少難咬。烤菠蘿伴山葵雪葩真係有好raw既wasabi味，開頭第一下覺得怪怪地，但食落又覺得幾得意，好少食到辣味既雪糕 XD焙茶提拉米蘇入口細膩，層次分明，整體唔太甜。