胡爐 (Closed)

今次嚟到胡爐就係要食佢地出名嘅火炎湯底，仲要叫佢招牌嘅椰子雞鍋。職員先將雞件、椰子肉生炒，再用烈酒點燃火炎，之後加入一整個椰青水同埋雞湯。煲滾之後梗係飲返兩碗先開始打邊爐喇，雞湯濃味，但一啲油都冇，仲有浸浸椰香味。由於有訂位優惠，每兩人送一野青龍蝦，肉類叫咗胡爐牛拼盤，同埋伊比利亞黑毛豬，拼盤有牛舌芯、牛胸爽、牛柳粒、安格斯肥牛、極上牛頸脊。餃子、丸類都係新鮮貨。仲有個紫菜響鈴，食完真係飽到上心口。