倫哥尊尚火鍋私房菜 (Closed)

晚市堂食放寬，終於可以同朋友出去開餐啦，今日朋友帶我去咗佐敦，食雞煲同打邊爐嘅任飲任食放題。先講地點，位於佐敦道大街，地鐵站一出行一陣就到，好容易搵。朋友book咗枱，所以唔使等位就有得坐。坐咗冇耐，雞煲先上，放低已經聞到香噴噴，侍應幫我哋炒一炒再冚蓋焗一焗就可以開始食，我哋叫咗小辣，雞為濃味，食落有少少麻辣，幾開胃下，我們得兩個人，但雞煲份量我覺得係三至四人分嚟，我們努力食得七七八八，就轉戰火鍋啦。火鍋料同飲品都係喺放係出面冷櫃任攞，飲品選擇都好多，除咗有韓國牌子，仲有幾款比較少見嘅果汁，正！我比較鍾意食菜，菜嘅款式都多，且望落新鮮，特別係油麥菜，我encore咗三次。如果係食肉獸嘅話，當然要食佢嘅肥牛啦，我攞完一碟都專登影相，色澤好ok，一睇就知係冇雪味果隻，一碟有五六塊度，唔覺唔覺都食左三四碟。最搞笑係我同朋友食食下先知原來有個海鮮拼盤，食物同賣相都好有質素，帶子、生蠔同海蝦都好新鮮，不過我同朋友都覺得，要試哂每一樣嘢根本冇可能，所以只有目標為本，如果各位朋友戰鬥力豐富的話，不妨試下佢嘅幾款醬爆丸同手製韭菜餃，絕對唔會令你失望。食完望住自己個肚，又知道係減肥嘅時候啦。