鍋匠中日火鍋專門店 (Closed)

今晚同8個朋友仔去打邊爐食雞煲放題，所以一早打電話預先book定位。不得不讚經理服務態度好好，本身book左7點半，未齊人都可以入去座先。本身限時兩個鐘，但都俾我地延遲計入座時間（可能平日卦😂）。鍋匠好容易搵到，距離地鐵站幾分鐘，樓下有塊大招牌，又有電梯直到，好方便👍🏻一入到去，環境幾日式feel，感覺都乾淨企理。坐底之後，員工就拎左一盤醬料俾我地調味。醬料方面，都係大路既野，例如蔥，蒜，麻油等等。我地選擇了花膠雞湯鍋，同重慶雞煲鍋。重慶雞煲鍋有好多雞夠我地分黎食😋我地叫左小辣，口味偏重，食到個嘴有麻既感覺。花膠雞湯鍋都幾好，清清地，岩我地唔辣得既人。本身平均每人$158，我地加$38(位)升級火鍋放題優惠，可以點選美國S.R.F.和牛及羊卷肉。呢個升級一定要加，牛牛好好味，口感不錯。其他打邊爐材料，就可以到隔離櫃自己拎。選擇唔多，但基本既都有齊，例如丸類，蔬菜類等等。另外，佢有甜品櫃，因為太飽所以就冇試到糕點。有食到糯米糍同雪糕，味道偏甜，不太推介。總括而言，鍋匠係一個平價任食火鍋既選擇，整體黎講我都好滿意。