火滾安哥雞煲酒館 (Closed)

今晚嚟到大角咀嘅火滾安哥雞煲酒館，店內嘅座位闊落，啱曬同朋友一齊嚟食雞煲同燒烤，我哋坐低個陣店員就介紹唔同嘅優惠同套餐，仲上咗一碟脆卜卜嘅花生，味道唔錯㗎～落單之後，店員仲拎咗唔同嘅調味料俾我哋，包括有蔥花、蒜蓉、辣椒同埋芫荽，可以按照自己喜好調節。平時係其他店食嘅雞煲都會用濃烈既醬汁煮成湯底，而今晚嘅雞煲係用上酒香帶出食物既鮮味。雞煲入面有鮮蝦、沙白、新鮮雞、豬潤、竹蔗、雲耳、馬蹄、鮮竹笙同蟲草花等，材料非常豐富。當店員送上雞煲之後會再加酒煮，最後用火槍點火造出火焰嘅效果，好似表演咁！店員仲好細心提醒我哋加咗酒之後唔可以打開雞煲住，因為電磁爐火力夠熱 ，大約等10分鐘左右就熟啦～由於有酒嘅關係，所以食落帶有少少酒味，不過食材都好鮮甜。滾咗一陣之後，店員會幫我哋開蓋，仲同我哋講要先食海鮮同埋豬潤先，避免煮得太耐呢。 海鮮湯嘅味道濃郁，而雞肉非常新鮮，入口嫩滑，配合埋鮮甜嘅湯汁，味道鮮甜得嚟又帶酒香。而且海蝦新鮮彈牙，加上沙白質感韌口，隻隻都脹卜卜，好正呀～食到差唔多，店員仲會主動幫手加湯。我哋仲加咗其他配料，有手打墨魚滑、 娃娃菜、韭菜餃雲吞雙拼餃子、同埋枝竹。雲吞皮薄餡靚，仲漲卜卜㗎