炑八韓烤 (Closed)

數下自己今個星期食咗中西日，仲爭韓菜。記起呢間响團購見過同早兩日响街派傳單。揀咗炆牛肋骨。晏咗出嚟差唔多兩點鐘，而且我聽到佢哋問我張枱落咗單未，應該漏咗單，結果等咗廿分鐘先上，仲要反問係咪冇比泡菜我…個牛肋骨有3大嚿，我嫌佢肥咗啲但幾有牛脂香，蘿蔔腍，冬菇厚身但唔知係浸唔透定品種問題，好硬實，結果咬咗一咬放棄。白飯有紫菜响面好味道，泡菜醃得耐咗有啲軟身冇咗清爽感，海藻湯幾好冇乜放味精。送埋汽水都係$78唔使加一，都算抵。