Mark One (Closed)

今日約咗舊同事食午餐，於是就去我哋嘅老地方”mark one”食。以前我仲喺炮台山返工嘅時候成日都同同事嚟哩間餐廳食，我哋嘅例牌係牛扒，其實餐廳每隔兩個月左右就會換新Menu，不過食材主要都係嗰幾樣，只係通常煮法會有少少唔同，或者醬汁會唔同。今個月原來係炭燒紐西蘭肉眼扒，而是日餐湯係南瓜忌廉湯，我order 左哩個湯同五成熟嘅牛扒，薯菜轉左跟飯。佢哋先上餐湯再上餐包，餐包係有焗過，所以外脆內軟仲有少少熱，而牛油可以自己選擇搽幾多。今日個南瓜忌廉湯同平時飲嘅有少少唔同，我覺得有d甜味，似乎落左甜粟米但係打碎左，好飲！牛扒的確做到五成熟，而且放落口真係食到炭燒嘅味道，之前幫襯過好多次都係order牛扒，次次都保持到水準，永無失手，超讚👍🏻反而今次嚟，覺得個服務差左，除咗因為人手唔夠之外，有個侍應好似唔知自己做乜咁，要收嘅碟又唔收喎，成日掛住睇電話，我地等左兩分鐘先至叫到佢埋單。