炸理滷味 (Closed)

唔知幾時開始，香港食店想突圍要係店名花點心思，帶點粗俗諧音就更加有noise，好似火鍋店叫「火鍋撚」咁，而呢間旺角小吃「炸理滷味」就係另一例子。呢度走懷舊路線，除左裝潢之外，店內仲成日播住80年代金曲。全店只得企位，要有心理準備。滷味東坡肉飯（$28）的盛器係傳統的萬壽無疆花紋，但其實係紙碗來的，幾有玩味。不過食味方面就比較一般，東坡肉味道甜甜鹹鹹咁都算ok，但肉質偏瘦，要花勁咬先吞到，飯粒亦煮得唔夠軟熟，所以整體都要有返咁上下牙力先好挑戰，或者點溫泉玉子魯肉飯應該會好d。限量供應的芝心海龍波波（$38）一盒5粒，薄脆炸漿裡面係滿滿的彈牙蝦膠，最中心係軟綿綿半溶芝士，有多重口感，好食。怕熱氣可以點d沙律醬一齊食。食完炸嘢，當然要食埋滷味先完整。滷味大全（$25）包括雞腎、鴨舌同大腸串。滷味的顏色非常深色，單看都知入味，而入口係偏甜而非死鹹。我最鍾意大腸，因為滷煮得好腍，雞腎就好爽口，鴨舌比較細條，但都唔差。順帶一提，店內提供多款手工啤酒，最啱用來送濃味食物，嗜酒者不妨一試。