星洲名廚 (Closed)

終於食咗呢間朋友成日狂推嘅星洲名廚😂 每次佢都會話呢度個炸豬扒有幾驚為天人，咁啱當晚九點幾響附近，周圍想食嘅都收哂，就索性入去試下啦🙈三條友兩個叫豬扒一個叫雞扒，雖然雞扒比豬扒平兩蚊，份量差成倍，雞扒得一塊仔切五六件，豬扒就疊成兩層八九件咁，明顯抵食好多，味道方面雖然話係香茅雞扒飯係完全冇香茅味，係幾嫩滑但普通雞扒囉，而豬扒就真係幾好味，厚切啖啖肉，炸得香口得嚟又夠軟腍，軟腍得嚟又有彈性，點埋個酸汁食又解咗個油膩感✨至於飯麵，煎蛋飯係絕對搵笨，隻蛋煎到封哂邊咁好似幾靚，但好細隻又好頹咁，俾多一蚊隔離成大兜咖喱，相比之下頹感更甚😂而咖喱就真係幾真材實料咁，嗜辣必選但我試咗啖就頂唔順，佢仲要唔係死辣，而係入口時得香料味唔覺辣，然後隔幾秒啲辣勁先至隨後爆出嚟，朋友好似食得咁過癮我就唔得囉😂我個黑豉油撈丁唔錯，係油咗少少，不過食前真係要撈勻啲先食，開頭嫌佢唔夠味，食到最尾好重味🙈btw佢個老火例湯幾好飲😛