ZAN CHEE (新城市廣場一期) (Closed)

新城市開左間韓式外賣店，太耐無去韓國玩了，今日返夜跟同事一齊去買左個外賣上公司食。店面唔算話好大不過大部分野都即刻整唔錯。芝士飯卷估唔到飯卷份量都幾大，材料都幾足。飯卷芝士有小小熔入面有有蟹柳、紅蘿蔔、青瓜、魷魚及甜甜地既蛋絲，口感幾豐富有疏菜整體唔會太膩，味道不錯！烤牛肉飯卷個人較喜歡烤牛肉味，材料大致跟芝士味的一樣，芝士部分就轉了烤牛肉，牛肉帶五香味道幾香同野味的，味道幾出！如果可以出埋芝士烤牛肉就更好了😋價錢唔算貴，仲有其他便當韓式拌飯，下次會再幫襯。