農場盆菜之家 (Closed)

見農場新出左烤魚放題，反應唔錯，今晚終於有機會同老公去試一試，星期四晚上7:30，坐滿左8-9成客人，大部分都係食烤魚，只有一枱客食雞煲。我哋叫左個C餐，蕃茄烤魚，$108/90分鐘，貪佢有碟牛頸脊，仲有無限追加火鍋料，順便試埋串燒炸物，睇下有幾伏先。一坐低就上4碟前菜，有辣芽菜、青瓜、白蘿蔔絲同蘿蔔粒，可惜我大肚，只可以食唯一一粒嘅紅蘿蔔😓，問店員可否轉皮蛋同木耳，店員話指定前菜，無得轉，就轉身走左，仲唸住叫佢收返d前菜，無辦法啦，做左隻大嘥鬼添。等左8分鐘左右就上烤魚，先開始計時，都唔算耐丫。烤魚配料有蕃茄、豆卜、木耳、豆腐，條烤魚並唔係前人食評所講咁無骨，實情係幾多骨下，不過勝在唔腥，口感似鯖魚，唔係滑。薯粉吸收左蕃茄濃湯好好味，不過個鍋太淺，湯又太濃，開到800w已燶底(最高係2000w)，個半鐘都煮唔林d豆卜。丸類唔錯，尤其是墨汁墨魚丸、薑汁皮蛋貢丸、芝士豆腐燒同炸麵筋，而且煮得「熱」嘅。牛頸脊就失望左少少，口感有少少靭，最好低溫灼熟會嫩d，牛味重。我哋點左蒜香大雞槌、紫薯餅同黑松露薯條，雞槌真係好大隻，炸左仲有好多汁、幾滑，紫薯餅好食，不過好滯，薯條粗身，炸得唔乾，好食過M