Foodhall by Moon Thai

Open Now

Now Closed

先介紹眼前呢杯，叫Dirty泰式奶茶。今晚去咗牛頭角，喺地鐵站附近嘅”Foodhall by Moon Thai”。一打開Menu就知要叫呢杯嘢飲。飲開咖啡都知，飲Dirty嘅原理係一啖飲晒兩層嘅結構，所以唔應該撈咗先飲。呢杯泰式奶茶沖嘅Dirty，分層效果做得好好，飲到底都仲可以見到兩層，而兩層味道嘅分別都好明顯，甚至有”甜-淡-甜”嘅效果，味道相當唔錯。跟住講返嘢食。呢度嘅燒烤出品相當唔錯，烤香茅豬頸肉，外脆內軟有炭香味。燒羊肉串，好特別，唔會羶，不過羊味爭少少。跟住我哋叫咗”瑪莎曼咖喱牛肉”，其實就係黃咖喱。一啲都唔辣，點酥餅食好舒服，咖喱味好香，果然係咖喱之王！最後叫咗芒果糯米飯，食落味道豐富。又凍又甜嘅芒果，同熱嘅糯米飯一齊擺入口，感覺好似返咗泰國咁！最後要講講環境，呢度有落地玻璃，空間感非常充足，一路食一路聽到廚房嘅炒鑊氣聲，幾好feel。