順記潮州飯店 (Closed)

潮汕菜一向係我同女友嘅摯愛，一諗起煎蠔烙、鹵水鵝、各種魚飯、石榴蝦、豆醬雞.....就不期然流晒口水..琴晚同女友嚟呢度撑枱腳，女友從來無嚟過，自己就好耐之前食過，依家連店名都改咗叫私房菜，但實際上跟以前無乜分別。自己之所以揀呢度無非都係想食佢獨一無二嘅豬頭粽，呢樣用豬頭肉製成肉凍嘅傳統潮汕冷盤，真係唔係處處有得食，因為好花功夫。食落有濃濃嘅五香味，無得頂...再嚟一個蠔烙，賣相不同一般貨色，唔係煎成一塊大餅狀嘅物体，而係一塊塊好似蛋角咁，蠔仔大大隻，味道較淡，主要原因係因預咗你會點魚露所以調得淡D，最最重要係唔知點解師傅可以將佢煎得咁乾身，碟底油量極之少，可見師傅功力之深，無得頂...壓軸好戲竟然係埋尾嘅沙爹芥蘭炒牛肉，一捧上枱時己知不得了--- 沙爹味濃郁，望落芥蘭顏色極之翠綠，食落極之爽口，明符其實嘅索索聲；牛肉品質極靚，又炒得剛熟，食落無渣；沙爹香而不辣，三者配合得天衣無縫，成碟差唔多俾我一個人掃晒，無得頂...兩個人加埋都只係食咗百一蚊，嘩!!!以後無得食點算ar...可以講响九龍城繼創發之後另一摯愛潮汕菜館..^_^