Mamaday (Closed)

朋友附近返工，約喺呢度食飯，開頭聽個名仲以為係同母親有關，後來先至知其實係中文嘛嘛哋翻譯過嚟。間餐廳好似行設計及創意路線，由入門口走廊位開始都見到好多好得意嘅裝飾埋設計，呢一層其實得佢一間餐廳但差啲連門口都搵唔到。餐牌同菜式名設計亦都好特別，真係要諗左好耐先知道其實係乜嘢菜式，每個都有一個好獨特嘅名，又長又難記，我最鍾意句子就係冇期望，所以唔會失望。午市套餐由$100起，但沙律或湯要加錢，特色飲品又要再另外加錢，但埋單都係$150樓下，銅鑼灣區唔算貴啦。頭盤沙律有生果同菜，配搭得幾好覺得生果好新鮮。虎蝦哈Ha欖油蒜香辣扁意粉睇外表估唔到咁辣，好似冇乜落辣椒，但都有中等嘅辣度，食得辣先至好叫呢個菜，意粉炒得好乾身個碟完全冇油，虎蝦肉質結實彈牙。唔好抱咁大期望蒲燒鰻魚蛋包飯，真係一個好長嘅餸名，加多$28可以有原條鰻魚，鰻魚size合理，但蛋包飯份量都算多，啲珍珠米炒得都唔錯算乾身，而我最鐘意食的木魚花的份量好多。紫薯窩夫，紫薯唔算甜，窩夫亦脆口。Flat White 咖啡配個中式杯，幾特別，咖啡亦有水準又大杯。