千里禪新懷石料理 (Closed)

Item: Xenri D'zen New Kaiseki Cuisine
Rating: 5
Author: 奧志雷

Xenri D'zen New Kaiseki Cuisine

24 Reviews

Taste

Decor

Service

Hygiene

Value

460

Causeway Bay

$201-400

Japanese Sushi/Sashimi

奧志雷

Level4

2.1K

Read full review

Plan A 山長水遠尋找懷石料理，搵到黎銅鑼灣千里禪，不幸地暫停供應！細心睇睇幾個 menu，都好多選擇，但今日無和牛刺生呢，只有 A3 和牛鐵板供應。嘩！雖然懷石暫停，但有類似懷石既 Kaiseki 會席套餐喎！睇完 set dinner 完全唔感興趣，唯有轉 Plan B Omakase 啦，都係我既第一次！

內籠裝潢傳統日式餐廳，優雅舒服、大方得體，亦都寬敝雅緻。今晚幾乎包場，大廳只有我地及另一枱食客，聽師傳講 VIP 房仲有客呢。環境非常寧靜，可以慢慢享受我既晚餐喇。

菊秀，比出羽櫻更香更醇！質感幼滑而清香，水質香甜配日本菜一流，力推！比我以往飲過既清酒有過之而無不及。先飲幾杯 hot hot 口，開一開胃預備起動食大餐 ﹗

炸鱈魚片，前菜小食，唔講真係估唔到係鱈魚黎喎，外脆似餅乾，裡面微微嚥韌有魚乾感覺，魚味清淡所以唔會覺得佢係魚囉。都幾香口，送送酒都唔錯。

螢光魷魚，從來未食過這麼新鮮肥美，脹卜卜甘甜，爽彈多汁既螢光魷魚，一咬爆汁，咸香味特出而帶澎湃霸道鮮甜香氣 ﹗以前食過既算罷啦，無得比。有點想 encore 添，但都係唔好咁衝動，仲有勁多正野黎緊！依家只係前菜乍。

食完兩款小食，Omakase 即張開始喇！好緊張呢，唔知師傅會整什麼美味、特別既時令靚菜呢，舞枱已經佈置好，青檸、昆布、豆苗、紅桑子、岩鹽、wasabi，盤景一樣，ready go！Part 1 首先刺生打開陣。

步鯛刺生，聞所未聞。賣相出眾、吸引力強。魚味較淡，魚油亦稍遜，肉質嚥韌非常有嚼勁，卷住日本蔥配酸醋同吃，清新又醒胃！由淡食到濃係常識，而且師傅會細心地從旁指導如果品嚐能夠食出最鮮既一面。

血鯛刺生，魚皮泛著銀光而透出微紅色，魚味散發微弱血香味，鯛魚肉質普遍結實中帶點幼滑；魚味清淡中帶一絲甜美 ﹗配上少少山葵豉油好美味啊 ﹗

橫線笛鯛刺生，外觀跟血鯛有幾分相似，味道都非常相近。魚皮顏色比血鯛更紅，穩約見到有條黑色線。魚味比血鯛稍為突出，沾上一點點青葵豉油能夠特顯更強既鮮甜味道。

帆立貝刺生，師傅教路，唔好添加任何調味料呢，直接啪入口就得喇，我當然信您啦。一跣入口，勁軟棉滑溜、香甜無比、餘韻強烈而持久 ﹗正到不得了，超級好味道！被上盛鯛魚連擊三野後，要先稍為舒緩一下情緒，再繼續戰鬥 ﹗

活日本象拔蚌刺生，雖然係比較細隻，又份量不多，但勝在片片爽脆滑滑，鮮甜味佔據每顆味蕾，暈得一陣陣 ﹗美味極致，無話可說。活赤貝刺生，血紅色的寶石，跟一般壽司赤貝有著天淵別。黏黏滑滑又鮮味，外脆內棉，強烈香甜味夠霸道但又討人喜歡，百吃不厭。

赤蝦刺生，意料之外質量媲美牡丹蝦，本來一直心裡都覺等赤蝦比牡丹蝦次一等，但依一隻實在令我刮目相看 ﹗新鮮度無可挑剔，顏色富光澤又閃令飲，質地既黏又夾爽、彈力十足，使到味蕾活潑地躍動，蝦甜味跟海水咸香直擊腦袋，舌頭已經完全臣服於赤蝦之下 ﹗

油甘魚腩刺生，我既致愛，比三文魚腩更愛 ﹗魚油豐富澎湃，滑嘟嘟細緻幼滑，又不失結實咬口。甘香魚脂餵滿每粒細胞，興奮異常，味道留係齒縫間久久不散。

吞拿魚赤肉刺生，由細到大對赤肉都好抗拒，因為小時候有唔開心既經驗囉 ﹗淡而無味、無魚鮮味、強烈雪藏味、等等。但今真係一雪前恥，原來赤肉都可以好好食架 ﹗雖然始終偏瘦削，魚脂欠棒，不過趙趙下鮮甜味道緩緩冒起，溫柔而不劇烈，質感腍得橡海棉，都唔差，食得過喎。衝刺左一段時間，毫無間斷不停地食 ﹗件件刺生鮮甜可口，配上鮮山葵蓉既清香，味道細緻，絕對無得彈！我只能靜靜地低頭慢慢咀嚼，全神貫注地品嚐！我問師傅：食客係咪有樣睇架？咁利害連續中左幾款都係我最愛既刺生呢！好正啊！

極上吞拿魚腩刺生，依件粉紅色吞拿魚腩不得了，可遇不可求，色澤光亮奪目，發晒光既粉紅色。一放入口就已經完全溶化，透進每條血管、每顆紅紅球，牙齒都無用武之地！香噴噴魚脂澎湃、油潤非常、滑溜甘香、滋潤心靈 ﹗溶化後只剩下少量魚筋，好有咬口要慢慢咀嚼，藏在深深處既香甜味道緩慢地釋出，非常可口啊！震動全身 ﹗

鷹羽鯛刺生，時令罕見鯛魚，可能條魚日日都有做健身，好有肌肉，超有咬勁，非常結實彈牙！外觀仲好鬼靚添，切成長條形，而且顏色真係好似羽毛呢！味道清爽帶甜美，泛著脫俗既感覺，不濃不濁不嗆！跟剛才幾款重口味、重魚脂既肥美刺生完全唔同呢，南轅北轍，可以讓味蕾及舌頭稍為歇息一下。

烏頭刺生，師傅新奇推介，有咩好驚呀，最驚無野食囉 ﹗本身烏頭味道清淡，卷上日本青蔥配埋鮮山葵蓉再沾少少醬油，好食到暈！又會咁鬼好味呢？軟滑棉棉，異常地鮮甜清爽，沐浴於晨曦甘露一樣。以後食烏頭仲蒸唔蒸蒸好呀？我只係試左幾塊，但 VIP 房內有食家 order 左一整條呢，十分羡慕啊 ﹗

昆布湯，連場激戰後，終於可以少休一會喇 ﹗估唔到今晚最初諗住食懷石料理，依家變左 Omakase 長途持久戰呢 ﹗飲返個熱辣辣清甜昆布湯，清清味蕾、口腔及食道，暖暖胃、回回氣先得呀。食左兩款餐前小食、12款刺生、飲埋依碗昆布湯，終於進入 Omakase part 2！

日式甜麻醬燒日本茄子，第一次食細細隻既日本茄子。口感及質感都非常好，茄子肉非常軟棉棉，非常濕潤，粗條纖維滑溜多汁，不過真係堅甜，但好好味。醬汁還滲著點點燋香，像燋糖又似麥芽糖，有趣。

鐵板A3和牛，賣相無得輸啦 ﹗和牛肉汁閃閃發光，加上茄子、豆苗、青辣椒擺位井井有條，甚為美觀得體。鐵板A3和牛，連滾熱辣鐵板送上，和牛躺在熱騰騰鐵板上不停釋出烤肉香氣，包圍整個身體，我頂唔住喇 ﹗一夾整塊掉入口，外層煎得香口微脆，緊鎖澎湃肉汁在內，一咬缺堤般泛濫 ﹗半溶化既和牛滑嘟嘟，肉汁豐富！溢出淺淺牛味，肉質彈牙有勁，中間粉紅嫩肉棉滑細緻，那有唔好食之理呢 ﹗細味極上和牛令到精神已在崩潰邊緣，即刻食條烤辣椒回回魂，雖微辣但亦不能掩蓋其爽甜味道。

金箔蘿蔔鮮淮山漬，黎個漬物清清味蕾、消消滯，so Good！好鍾意食爽脆鮮淮山，咸中帶甜既醬油味加埋酸蘿蔔就夠晒開胃啦，撒上金箔閃閃生輝更覺氣派。

笠子壽司，又黎不知名既當灶鮮魚，越神秘越喜愛，食家最基本要有冒險精神！笠子肉質軟棉滑溜，味道清淡中泛起醬油清香，還食得出微弱山葵芳香添。順序漸進，由淡食到濃。師傅話已經調好味，裡面已經加左鮮山葵同豉油，無需再加任何調味料架喇。Yes sir ﹗完全明白。所以剛才 waiter 已經將枱面既山葵豉油收起左嚕。

比乃之壽司，好有光澤既顏色，非常誘惑。二話不說一掉入口，魚肉軟棉棉滑溜溜，涼快、舒服感覺直迫心臟，好感動啊 ﹗清清淡淡，溢出淺淺豉油山葵味，鮮魚清甜味夾雜其中，溫和既味道。壽司飯略濕左少少腍左少少淡左少少，甜醋不夠突出，免強合格！暫時食過最 top 壽司飯係秋田！繼 part 1 刺生、part 2 熱燻後，終於食到 part 3 既壽司喇，其實已飽飽地。

紅衫魚壽司，唔係掛？食完烏頭刺生依家到紅衫魚刺生，真係可以生食？我無有怕啦。油潤反晒光既淺粉紅色，程半透明既魚生若隱若現非常誘人。質地非常有彈性，滑溜就唔在講啦，魚味比剛才笠子及比乃之為濃，好味道 ﹗加埋日本子薑同鮮山葵蓉就更加好味！日本子薑咁甜既？而且只係小小辣乍喎。

火炙平目裙邊壽司，燒完勁油潤呀！魚脂勁到滴出黎，溶化左既油脂已被飯粒完完全全吸收，散發出濃厚魚脂香氣 ﹗燒過既平目味道更加濃縮，魚味特濃，外層香口鬆軟滑潺潺，裡面滑溜帶咬口，一個字 ﹗正 ﹗

火炙吞拿魚腩壽司，油脂豐富既魚腩最好配壽司黎食，可以索盡所有精華，一滴不漏，無浪費呢 ﹗最肥美既粉紅色吞拿魚腩燒完後表面充滿油份，甘香無比，一跣入口 ﹗跟飯粒打得火熱，完全混和。軟滑無窮既魚肉，閉上眼感受一下香噴噴幸福之味。火炙鰻魚壽司，唯一我鍾意既熟壽司，因為啖啖肉麻。鰻魚燒得芳香，鬆軟滑溜魚肉夠厚又有肉食，掃上甜醬油就食得更加滋味啦 ﹗

赤海膽軍艦，第一次食赤海膽。係無飯既軍艦呢，海膽塞得滿滿再包上燒過既紫菜，燒過特別香脆架喎！深橙色帶點紅色既赤海膽居然係結實彈牙架 ﹗從來味食過彈牙飽滿既海膽，好得意、好有趣！味鮮濃郁、清甜又可口！正到震。

火炙吞拿魚筋壽司，點解咁重牛肉味既？竟然燒完既吞拿魚筋會係牛肉味囉，仲要牛味極濃而香甜，軟滑棉棉又油潤，香口甜美，非常好食。

香蔥吞拿魚腩蓉紫菜手卷，紫菜脆到勒勒聲呀 ﹗香蔥混埋激油吞拿魚腩蓉真係絕到無輪，香甜度爆燈，完完全全比佢攻陷，我投降喇 ﹗就算依家飽到食唔落都要食晒先甘心 ﹗

麵豉湯，開心既時間好快過，話咁快又到尾聲喇，飲埋個暖笠笠既麵豉湯先。自家綠茶布甸、自家麥芽軟糖！飽飽飽，攬住個肚腩返屋企！麥芽乾糖好香又唔太甜，嚥嚥韌韌好好味喎，連我唔鍾意食甜既都讚。

勁搞笑！Omakase食到手卷既時候我居然問師傅你仲有幾多款未出呀？我已經好飽頂唔順喇！兩款小食，12 款刺生、兩款熱燻、1款漬物、5款壽司、1款軍艦、1款手卷、兩個湯、兩款甜品、1支清酒！只需 $1000 蚊位，物超所值啦 ﹗