樂湯雞麵館 (登龍街) (Closed)

朋友知道我鍾意食米線，特別介紹咗呢間位於銅鑼灣登龍街，主打花膠雞湯米線俾我試吓。值得一提呢間餐廳標榜真材實料，冇添加味精，仲可以落單時提出少鹽少糖，感覺健康好多。菜單多樣，除咗有砂鍋雞之外，仲有撈丁、大碗飯等。我哋點咗招牌砂鍋花膠雞湯翅米線同砂鍋海王雲吞雞烏冬，另加小食醉豬手和拍青瓜。招牌砂鍋花膠雞湯翅米線（$94）- 不愧為招牌菜，雞湯底鮮甜清澈，雞件好嫩滑，仲有肥厚嘅花膠同魚翅。米線入口好滑，呢個米線我比好高分。砂鍋海王雲吞雞烏冬（$94）- 呢個專登加錢轉揀咗稻庭烏冬，入口夠晒煙靭。雲吞配以雞件及雞湯，美味可口。鍾意佢連砂鍋上，熱辣辣，特別好味。此外兩個小食都十分出色，醉豬手（$58）肉質爽口，以花雕酒調味，入口好惹味。手拍青瓜（$32）清爽好味，青瓜脆嫩清爽，味道微辣，十分開胃。點粉麵飯，可以半價加購飲品，包括汽水、自家製豆漿及烏龍茶。