斗滾 (適安大廈)

Open Now

Now Closed

西環一向多好野食，經過山道斜路見到有新鋪開張，開張期期仲有優惠送，嗱嗱臨入去試下！玩法非常簡單，每位$268，先食雞煲（任食，可再添），後食蒜蓉粉絲蒸海鮮，再飲每星期不同既養生湯，最後再用養生湯打邊爐，聽到都覺得好飽！！雞煲鑊氣十足，雞件雞油味濃重，唔會件件都係骨，都幾多肉食，最重要係食完可以再Encore！不過我地怕無肚，所以食左一轉已經要去下個Step：蒜蓉粉絲蒸海鮮海鮮跟人頭計，有蜆、開邊蝦、扇貝、蟶子、鮑魚同烏冬。海鮮用蒜蓉、荷葉同辣椒仔一齊蒸，有海鮮原始既鮮甜味之外，仲帶淡淡荷葉香味，辣辣地仲惹味啲添，好正！終於黎到最期待既養生湯環節，養生湯每個星期都不同，今日係蟲草花花膠燉竹絲雞。店員話每日都至少用左三個鐘去熬架！原隻竹絲雞用料大方，軟腍入味。雞湯清甜唔油膩，最重要係飲完唔會口渴～食左幾輪，終於落料打邊爐！超級推薦手切牛頸脊，牛味重，入口爽彈，好滿足！