兩草 (Closed)

呢間大坑嘅小店叫兩草，高質素加上價錢親民，開業不久已有唔少捧場客。馬拉菜當然唔少得肉骨茶！招牌胡椒肉骨茶，做法有別傳統，接近福建人口味，雖然欠缺藥材味，但就有超重胡椒鹹香，且帶點辛辣，味道幾過癮。不過主角其實係碗煎蛋肉餅飯，每枱必叫！老闆對自己功架似乎十足信心，皆因太陽蛋寫到明係脆邊，輕輕吉爆嘅蛋汁，撈落煎到金黃嘅肉餅，再加一圈甜豉油，曬上葱花，簡簡單單但好味道！另外嗌咗蛋炒豬腸粉，超香口！即叫即炒，其間加入豬油、甜豉油，最後加入蛋漿，炒到見微燶，即刻上碟，唔會過龍。