有得餃

Open Now

Now Closed

有得餃幾年前我已開始幫襯，記得當年最出名嘅就係五色餃。舊年佢搬咗去對面街新鋪，地方大咗，客人都多咗，唔單止等位耐，如果撞正佢哋啲餃賣哂包唔切，聽講仲會突然之間拉閘唔做生意😱，所以幫唔幫襯到，其實都要講彩數😂。雖然主打餃子，但呢度最多人讚好嘅居然係佢哋個秘製醬汁撈麵，以醋同醬油為主嘅醬汁，裡面加咗非常多嘅蒜，芫茜同蔥，撈埋粗麵條一齊食，非常惹味👍，不過食完個口會幾臭😆。餃子方面，蒸餃款式比較大路，size 偏大，餡料豐富，味道不錯，不過餃皮偏厚；炸餃款式則較新穎，例如我哋 order 嘅芝士比薩炸餃，餡料味道就同 pizza 一樣，好有趣。至於另一個小食香脆芝士煙肉薄餐就脆卜卜好香口。呢度同隔離嘅醋頭家有做聯營，幫襯完去隔離買飲品有九折優惠，大家合作，齊齊撐起黃色經濟圈💪。