八座小食 (Changed Hand) New Restaurant

牛頭角下邨拆卸重建，附近商場以牛下懷舊主題打造商場，除咗有小店外，更組成懷舊小食FOOD COURT，名為得米小食檔，當中有各式小店，主要售賣街頭小食，重拾舊日牛下風釆。 五香牛雜(細)$20牛雜用舊式明爐一路煮一路賣，離遠都聞到八角等香料味，突然間好肚餓，牛雜除咗湯底夠味，亦炆得夠時間入晒味，腍滑有嚼口，直頭係以前牛下牛雜麵嘅味道，將小小一碗歷史同回憶，食落肚記入心，意猶未盡，再試另一樣「賣飛佛」 腸粉$10/4條最簡單嘅街頭小食，好味與否，視乎一點點細節。先用一小匙豬油均勻搽滿臘紙，一定要係豬油，先會有獨一無二嘅油香，再準備稀釋嘅麻醬、豉油同大量芝麻灑上面，我喜歡加埋甜醬，試第一件，就知跟足上述舊式做法，淡口無味嘅腸粉係媒介，揉合醬料配料成為整體，入口甜鹹芝麻香一齊爆發，就係腸粉令人夢縈魂牽嘅魔力。樂見商人將食肆加人本土原素，社區除咗要更新，亦不應忽略保留特色，食嘢除咗要好味，亦好應該保留人情味。