魚眾不同酸菜魚 (啟德一號) (Closed)

呢個星期天氣又涼返，所以燃起了煲仔飯嘅心！放工後嚟到啟德嘅「魚眾不同酸菜魚」。呢間餐廳自稱係酸菜魚專門店，但食過幾次之後，反而覺得呢間最好食嘅係煲仔飯。今日我哋食咗臘味煲仔飯、麻辣濃湯墨魚片同埋紅糖糍粑做甜品。臘味煲仔飯 ($72)呢度啲煲仔飯要等30分鐘，不過每次一食就覺得30分鐘係值得等！臘味夠油(肥)夠味，而且見到啲鼓油好似有煮過，唔係一般市面上買的甜煲仔飯鼓油。不得不講、最出色就係佢啲飯焦，每次食都可以整碗飯焦起到出黎，加埋鼓油好食唔膩口，超有滿足感！麻辣濃湯墨魚片 ($85)利申:我食到一半先發現唔記得影相......墨魚片好新鮮，咬落去都有啲Q彈，而麻辣湯底幾濃味。呢度最好係佢可以比你自選調味同配菜，如果平時唔食得太辣就記得揀少辣少油啦！份量唔算特別多，價錢如果可以平少少就更好了。紅糖糍粑 ($28 - 半份)最後叫左半份紅糖糍粑，外層似飯焦咁脆，而入面口感似麻糬，加埋紅糖(=黑糖?)都幾好味！雖然知道「魚眾不同酸菜魚」有好多分店，但唔知係咪間間分店嘅煲仔飯都咁出色呢，所以每次食都一定去返啟德！