時新漢堡飽 (Closed)

自己有幸係時新仍在紅磡嘅時候爸爸帶過我食一次，之後時新就結業，但今年時新捲土重來，今次搬遷到黃埔，所以今次到我帶爸爸去回味當初熟悉既味道。裝修比之前華麗得多，有兩部大電視。餐牌顏色鮮豔，食物選擇更多。雖然裝修失去了港式快餐風格，但未嘗不可？但求食物水準仍舊。時新最iconic既食物非漢堡包莫屬，貪心嘅我叫咗雙層漢堡包。烘過既嘉頓牌芝麻包夾住兩塊厚身漢堡扒加豐富沙律醬。有別於美國漢堡快餐店，時新既漢堡扒特別鬆化，充滿懷舊港式風味。炸薯條轉左炸雞粒配咖喱汁。外表粉薄，炸到非常香脆，咖哩汁唔太辣。最後仲有一大杯紅豆冰，紅豆超多，奶味特別香濃。現時香港漢堡店競爭激烈，希望今次唔好再成為集體回憶，能夠一直長久落去。