金鶴拉麵 (和富道) (Closed)

大嬸十分懷念佢係大阪食過嘅雞湯拉麵，見到香港有得食梗係去試啦！大嬸叫左普通嘅“雞白湯拉麵”，一嚟到即刻試下個湯，umm好味😋！雞味好濃仲有大量嘅蔥，零舍香。店員一上個碗拉麵就提醒個啲炸牛蒡要脆食，所以大嬸就即刻將佢地夾起費事淋哂。牛蒡炸得好脆，食落又好有牛蒡味。碗麵仲配左兩塊肉，一塊雞一塊豬，個雞肉唔錯，雖然係雞胸但係唔嚡👍🏻。大嬸飲飲下啲湯，就覺得個湯陣味好似好熟，發現原來好似大嬸屋企煲個啲雞粥，一樣係雞加埋蔥嘅味道😆。大叔就叫左“黑蒜醬油湯拉麵”，湯底都唔錯，好香黑蒜味，又唔會好鹹。因為佢哋叫咗二人餐，所以仲有兩個小食。“唐揚炸雞”炸得幾好，雞肉好滑仲好juicy。“燒黑豚串”就差啲啦，個醬汁太鹹，大叔大嬸都係食咗一粒就無食。最後，店員仲送左兩粒抹茶蕨餅，今餐就完滿結束🤗。