添好運點心專門店 (Closed)

今日重臨呢間已有十年多歷史，曾被米芝蓮推介🎖，專賣廣東式點心嘅添好運。隨著呢種形式嘅點心專門店開得越來越多，店外已經無大排長龍嘅風光，但店內仍然坐滿食客。有啲點心係出邊未見過，所以好想試，叫吓叫吓就叫咗8⃣️樣點心，兩個人食...ok啦‼️招牌點心——酥皮焗叉燒包係必食之選，咁多年都可以保持水準。牛油酥皮香味撲鼻，入口甘香鬆化，麵包鬆軟微甜，叉燒大件Q彈又味濃，正到不得了👍。晶瑩鮮蝦餃確實晶瑩通透，蝦餃皮相當薄，蝦肉亦好新鮮彈牙👍。豉汁蒸鳳爪雖然能夠做到骨肉分離，但味道好淡。其他點心嘅味道亦未見突出，黃沙豬潤腸超滑嫩，但豬膶太細件，亦淡而無味。薑蔥牛肉角款式特別，牛肉彈牙入味，但係配合醬汁食就有啲格格不入。XO醬芋頭糕煎得太燶太實。如果店舖能夠將特色點心嘅賣相同美味做得更加好，亦同時保留傳統出邊少有嘅點心，咁佢應該可以重振聲威🥳🥳。