辣辣屋

Open Now

Now Closed

好少過嚟粉嶺，放假入沙田大圍行吓，晚餐一於就過嚟粉嶺搵食。聯和墟呢邊有好多唔同嘅餐廳小店，我哋就揀咗呢間食烤魚嘅餐廳。入到去，座位數量雖然唔多，但幾乎全部都係卡位。呢間餐廳除咗食烤魚之外，仲有好多BBQ嘅食物，同埋一般港式茶餐廳見到嘅西餐。我哋嚟到，就梗係叫一盤烤魚啦！呢度嘅烤魚全部都係江團魚，好少聽到呢種魚，我哋揀咗泰式酸辣味。上菜見到成條魚好大條，而且上面鋪滿泰式香料，淹沒晒成條魚，視覺效果一絕！條魚本身有炸過先再上盤，所以聞落都好香。食落去嘅口感好鮮嫩，唔會烤到老晒，同啲香料好夾。我哋另外仲叫咗一份薯粉，呢種薯粉好快就煮淋，而且索晒烤魚汁嘅香料味，好似食緊酸辣粉咁！我哋又叫咗一份燒水牛城雞翼，一份有四隻，每隻都大大隻！未食已經聞到嗰陣燒烤嘅味道，食落去好Juicy，微辣，夠晒bbq癮！呢度仲有幾款唔同嘅特飲，佢寫明係800 ml，其實夠兩個人飲有突，但我哋數學太差，完全對800 ml 冇概念，結果一人嗌左一杯，唔怪得個侍應姐姐仲特登走黎問我哋係咪真係叫兩杯！我哋叫咗菠蘿特飲同凍柑桔檸，兩杯夠晒冰涼，完全解到烤魚嘅辣。今餐食到飽飽，聯和墟真係好多美食，下次經過又試吓其他嘢先！