百味 (Closed)

冬天食小菜嘅最佳選擇就係煲仔菜，因為夠晒熱辣辣又非常惹味！位於銅鑼灣新開嘅百味，餐廳主打粵菜同川菜，所以餐牌選擇非常多，廣東小炒同麻辣選擇都有，當然唔少得煲仔菜啦，真係胃口大開，一定要叫多兩碗白飯靚仔先！紅油木耳青瓜前菜有呢個紅油木耳青瓜，木耳同青瓜都非常爽口。紅油辣味濃香，但作為前菜，辣度又唔會太搶太攻，夠晒開胃。粉絲什菜煲呢個粉絲什菜煲份量十足，一打開煲蓋就傳嚟蝦米嘅香味，蔬菜有西蘭花同菜心，我哋特別鍾意索晒湯汁嘅西蘭花。但講到精華所在，就一定係粉絲，好入味呀！三杯雞煲兩個人食最啱就係叫個細煲，份量啱晒。三杯雞用咗好多唔同嘅配料，好似有蔥、蒜、薑、芫荽等等，所以一打開煲蓋，就聞到非常濃郁嘅香味。而新鮮滾熱辣嘅雞煲，雞件份量多，肉質嫩滑，好惹味。酸菜鱸魚鍋同樣地，呢個酸菜鱸魚鍋細煲嘅份量就啱兩個人食。鱸魚片嘅魚肉好嫩滑，完全無骨；食酸菜鱸魚鍋重點當然係寬粉啦，索晒啲酸辣汁，超好味！