好燒味 (Closed)

我真係好鍾意食燒味，當決定要寫呢個食一百次燒味嘅project其實令我好興奮，因為我會刻意去一啲本身好喜歡但唔想去嘅地方返食我喜歡嘅嘢。好燒味就係其中一間。今日路經金鐘，做完嘢我就買個飯盒返公司食。我以往好鍾意食佢嘅核蛋叉燒飯，雖然比別人貴，但慢煮叉燒加日本溫泉蛋，諗起都流口水。去到好大個Menu寫住燒味雙拼，咁我就問佢單拼幾錢，佢話一樣$49因為會比兩份我。加多隻溫泉蛋$9 ，總共就$58。加多一杯嚟湯，$18，跟餐$15標榜冇味精，細細杯，但我覺得價錢尚算合理。而且都應該真係冇味精，亦都尚算香濃。但係我買完先見到原來有核蛋叉燒飯$51蚊，點解佢唔同我講？而且我唔覺得叉燒多咗！如果好食都算啦，蛋嘅質素維持到，但啲叉燒又乾又柴皮，比以前退步咗好多！我街口嗰間街坊燒味店都好食過佢！令人非常失望，浪費咗我一餐飯嘅quota ！以後唔會再食！