泰式燒王 (Closed)

放假日夜晚老友帶隊食飯，一行四人來了九龍城呢間燒王﹗店名好似改左，睇餐牌同而家呢個bbq2有出入，好在有留意地址，唔係食評也寫不到﹗先來一碟白灼螄蚶，友人說是過熟因全部已開口，但咁樣反而我覺得ok，因最怕就是佢地0的血汁，一試下帶濃烈腥鮮味，友人說這是極品，一隻接一隻，蘸少少辣汁來吃超滋味，三個人唔洗五分鐘就食哂成碟，我就不太懂得欣賞了﹗生蝦刺身一碟12隻，蝦比較細不過新鮮，入口軟糯，最緊要係有個辣汁吊起個鮮味，正﹗再試蠔仔煎蛋，鐵板上蠔仔同蛋都是半生半熟，蠔仔肥美味道香濃，口感滑溜夠味，用來送飯一定一百分。咖哩大蜆相比次下比較遜色，咖哩做得不濃亦不香，用來蘸o下蒜蓉包都還可以，要來煮蜆就是有等於無，全晚唯一大家覺得麻麻地的一味餸﹗木瓜沙律辣而惹味，賣三十幾蚊份量卻相當多，木瓜絲又爽又脆，宜逐少逐少吃，如一急一定辣到流眼水，過癮清新之選﹗燒雞大隻而肉厚，味道帶炭香，似自已bbq的感覺。不得不提是我自己都係第一次食既牛胸肉，肉粒切成粒狀，就咁睇以為粒粒都係肥膏似的，食落口感卻是爽脆似豬頸肉有o趙頭，烤焦味濃滿腔濃郁油香，份量亦多送紅酒啤酒真係一流，食到唔停得口，下次如路過此地可以打包一份