神燈燒 (Closed)

今日有新遊戲推出，好在一早訂定，店主通知今日可以提取，立即換衫飛奔出去取貨。為咗今晚可以慢慢先睹為快，決定早少少食飯再回家慢慢玩。突然想起有間放題燒肉店在附近，一直也想試試，而且還有早鳥優惠，價錢可以平一點。任食套餐分為5個Level ,最後揀了Level 2 ,已經包了出面自取所有飲品，食物，甜品，而且還有QR code 揀取刺身飯、特式飲品，炸物小吃等等。天氣太熱一坐低先叫飲品，特盛.綜合水果茶，份量超級大，一杯應該差不多有1L 份量，果味香濃，入口酸酸甜甜，清新又解渴。出面小吃熱葷會不時轉款，有泡菜炒年糕、關東煮、咖喱牛腩、辣酒煮花螺等等，關東煮蘿蔔超入味，入口清甜不苦澀，花螺肉質軟淋，辛辣刺激。燒肉都挺多選擇，有各式豬牛雞，還有丸類，雞翼等等，特別喜愛雞翼，蒜蓉味蒜香味濃郁，肉質鮮嫩，而香辣味辣勁十足，香氣四溢。美國牛舌心肉味香濃，肉汁豐富，大愛。美國肩胛大理石雖然油脂不算太多，但肉嫩可口，沾上燒肉汁更加惹味。