響 - Hibiki 日本燒肉 (Closed)

今日約左幾個朋友食呢間燒肉放題，知道呢間都好似幾多人食，所以都book定位。晚市放題送海鮮拼盤，個人認為帶子同蝦最出色，帶子有粒小牛油係上面，燒個時牛油滲入左帶子裏面，又多汁肉又嫩。蝦就超級大隻，肉質鮮嫩，食落又唔覺好膩。仲有一條喜之次，都幾正，啲肉質都唔差幾嫩。肉類方面，賣相唔錯，油花都算分佈平均，而我特別要提既係澳洲和牛胸，因為佢係咁款隻牛裏面最好食，入口即融而且唔"韌"，識嗌一定再嗌佢，而和牛肉眼都ok係第二好食。七味豚拖羅就幾入味，有濃郁肉香加七味粉作調味，幾有口感。雞翼都大隻肉質都嫩不過就鹹左啲。剌身就全部都好新鮮，海膽肥厚好似帶點海水鮮甜，好有口感，再配合埋紫菜包黎食都得。生蠔就肉質豐厚，蝦都大隻爽口。八爪魚片都幾有咬口，三文魚、吞拿魚同帶子都幾滑嫩。其他食品例如炸物、串燒同鍋都唔錯，熱辣辣咁上，炸得幾脆口。甜品黎講食雪糕雪條都無問題，有多款口味，一定有款岩你食。