喜來稀肉 (瓊華中心)

Open Now

Now Closed

同個肚餓得嚟又唔可以食太多嘅朋友去食晚飯，所以當然由佢決定食乜嘢比較好，跟住兩個人就走咗去旺角，等佢帶路嚟咗喜來稀肉。地點都算方便，旺角地鐵站想去行幾分鐘就到。雖然係星期六，但係可能嚟到嘅時候差唔多9:00左右，所以唔使等位直接就有卡位坐。因為朋友之前已經嚟過食嘢，所以交俾佢發辦。至於前菜方面係自己出去自助攞嘅，攞幾多食幾多，想特別提一下佢嘅泡菜好好味。首先係牛五花，啲牛肉冇乜醃製過，所以食落去都非常有牛肉味，我同佢都比較喜歡淨係點鹽食，可以保留比較多牛肉味。跟住係一個韓式烤豬皮，豬皮嘅份量都算好好，燒完出嚟食好香，完全唔會覺得肥膩，食完爭啲想再嗌多份。仲有叫咗一個蟹籽紫菜飯團，佢係要自己加埋啲沙律醬落去帶住手套用手撈嘅，味道都唔錯。其實最後要講下佢嘅盧邊蛋，一邊有芝士一邊冇芝士，兩邊都好好食，食完仲可以叫人嚟refill。非常抵讚，總括嚟講好味得來性價比亦都非常高，絕對可以再食。