金華美食

Open Now

Now Closed

心血來潮到長沙灣試一試一間石磨皺皮腸粉，點知去到先發覺冇開，十分掃興之際，喺附近遇到呢間店仔細細，但竟然有人龍排隊嘅「金華美食」，望一望原來係賣魚蛋燒賣腸粉，抱住跌左個橙，執返粒柑嘅心態，決定跟隊排一排，睇下有咩咁好食！食店由兩位年紀較大嘅夫婦（相信係）主持，又要整又要賣，呢個亦係要排隊嘅原因，食物選擇亦不多，魚蛋、腸粉、燒賣、牛肉球，價錢放在當眼處，所以排到你落單先知幾錢。結果嗌左腸粉、魚蛋同燒賣，加混醬唔辣。食一啖，不得了，講緊個混醬，用左豬油、甜醬油、麻醬、甜醬混成，完全係唔講成本咁落，加埋熱辣辣腸粉食落，正！魚蛋用陳皮魚蛋已經冇得輸，燒賣唔粉亦好食，簡簡單單已經整到香港最好味嘅街頭小吃！總結而言是「好吃！」，不過都平衡返一句，如果店主再搞好少少店舖衛生，又將收錢同食物嘅位置搞好少少就更好了！