尚月廚房 (餃子湯麵專門店) (Closed)

假日午市食lunch，餐廳新開業一段時間，環境乾淨，主打餃子、爆汁牛丸，價錢親民。叫左湯餃子雙拼菠菜麵($46)，芝心牛丸菠菜麵($42)，芥末青椒皮蛋($14)。雙拼餃子各款有3大隻，粟米豬肉餃既粟米香甜。韓式辣味豬肉餃餡料有特色，唔算好辣，泡菜惹味，幾開胃，餃子皮厚度適中。而芝心牛丸有驚喜，一咬d汁及芝士爆哂出黎，食個陣要好小心。芝士少少拉絲，就好似食緊芝心丸。牛丸重牛味，爽口，值得叫黎食下，因為好少見。菠菜麵既菠菜味唔算好濃郁，份量多，就算男仔食都好飽。小食芥末皮蛋幾過癮，好少餐廳會配芥末醬。餐廳製作既芥末醬唔會嗆鼻，同皮蛋又幾夾，會愈食愈上癮。不過一碟既份量唔算多。整體，難得係馬鞍山搵到好食餐廳，而且唔貴，清淡。