尚上下夏 - 養生雞煲火鍋 (Closed)

父親節一家人去咗試下依間火鍋店，之前經過見到佢個裝修幾特色，好有香港地道既味道, 個名又改得咁鬼馬。佢依度有雞煲火鍋或者就咁打邊爐，今次我地就無揀雞煲，揀咗鴛鴦湯底打邊爐。店內既裝修好有香港特色。一坐底店員就放底咗依個醬料盆俾我地，好齊全。湯底分別揀咗瑤柱群翅雞湯同養生藥膳湯，啱哂一家大細。兩個湯底都好足料，香濃好味道，真係一個俾人飲既湯咁。今日父親節我地一於食豪啲，叫咗依個最頂級既手切極品靚牛，一定滿足到一班牛魔王喇，睇顏色同花紋就知一定好食喇。打邊爐除咗牛肉之外，仲有海鮮都唔少得，依個係海龍王拼盤，裡面有大虎蝦，鮑魚，帶子皇，蟶子皇，花膠，珊瑚蚌，桂花蚌同花甲，我地叫既係4人用既，啲份量都好夠，同新鮮。依度啲手打肉丸都值得一試，尤其係依個手打香蕉墨魚丸，第二度試唔到，香蕉味既墨魚丸真係好特別。我地仲叫咗其他好多野食，每樣都無令人失望。想打邊爐依間尚上下夏係一個好選擇，下次我會試埋佢個雞煲帶幾好味先得。