碗碗香 (Closed)

香港夏天咁熱，成個人都無咩胃口。諗住求期食碗粉麵飽肚就算。點知又俾我同朋友搵到正野！早收工，六點就坐底左，成功避開晚市人潮。👍🏻一睇menu就知道呢間麵店有別於一般米線店，佢係主打貴陽牛肉麵，而且因應香港人口味已改良辣度。第一次幫襯，保險d叫左兩碗牛肉麵$58@，一碗辣一碗唔辣。下單時會問定選咩辣度： 唔辣、小辣、中辣、大辣。一上枱，已經有驚喜，牛肉份量都幾多，而且每粒都大大粒，並且好淋身，十分入味。麵條睇落似烏東，但食落口感好大分別！好彈牙，外面好少食到呢個口感。店員話佢地嘅麵條新鮮製，而且采用全米漿做，所以份外彈牙同好香米味。如果唔食得辣，都唔洗擔心，唔辣嘅湯底本身已經好惹味。另外加$9有一大杯苦丁茶，味道有少少回甘。有消熱解毒嘅作用，食完辣野都唔怕熱氣！其實仲有各式各樣嘅小食，但食完咁大碗牛肉麵都開始飽，下次黎再試埋其他小食先！