新仙清湯腩 (Closed)

呢度嘅牛腩選擇好多好豐富，每次嚟我都會揀唔同部位試，唔試晒又點知邊個部位最正喎~今次食嘅就係坑腩，據我所知，坑腩係牛肋骨部分，肉質好有彈性，但數量好有限，而且好多餐廳嘅坑腩都一味得個"肥"字。呢度就好體貼喇，店員問我想要偏瘦、偏肥定係半肥瘦，我就揀左肥瘦適中，咬落真係好淋好滋味，個人認為半肥瘦坑腩係最入味嘅~而且份量亦唔少，一碗有成六、七塊，食得好滿足！另外亦點咗炸雲吞試試，外酥內軟，咬開金黃色嘅雲吞皮，即刻見到漲卜卜嘅肉餡，點一點香濃的醬汁，混埋豬肉粒、蝦粒同香菜碎，令味道更突出。