相馬日式火鍋 (Closed)

之前已經黎食過，見好似都好耐無食過就去食下啦，點知原來新加左串燒既菜式，令我同朋友加添一點新鮮感。咁我地就叫左美國特選牛肉 120分鐘放題 包埋豚肉同雞肉，炸物同串燒都係任叫。咁會先嗌湯底，我地叫左豚骨湯底，覺得幾香幾濃郁，係唔錯既選擇。然後今次覺得佢既雞肉好食左好多，非常嫩滑，牛肉亦都唔算"韌"，幾薄身易入口，不過如果豚肉可以嫩滑d就更好。各類基本火鍋配料都有。串燒都嗌左好多黎試，特別欣賞燒雞皮、雞肉串、薄燒牛舌串，雞皮炸得卜卜脆，好惹味，雞肉串肉質亦都係好嫩滑，仲有點燒汁既味道，牛舌唔"韌"幾有咬口。至於炸物仍然係咁好食，雞翼、炸雞唐揚、餐肉、蝦都係必嗌，外脆內軟，雞肉肉質嫩滑，加埋沙律醬，加添一點美味。今次主打食佢地既串燒同炸物，不過都一定要襯熱食先最好食。另外仲有甜品同飲品都係任食任飲，牛肉有另外幾款，有機會會試下其他。